ރައްޔިތުންނަށް ބޭސިކް އިންކަމް ދޭން އެންމެ ރަނގަޅު ވަގުތެއް ކަމަށް މިކަމުގެ މާހިރުން ދެކެވަޑައިގަންނަވަނީ މީގެ 20އަކަށް އަހަރު ކުރިންނެވެ. އެއީ މަޖާޒީ ގޮތުން ބުނެވުނަސް މިކަމުގެ މުހިއްމު ކަން އަންގަވައިދެއްވަން ބުނާ ގޮތެކެވެ. އިގްތިސޯދީގޮތުން ބަލާއިރު ހުރިހާ ރައްޔިތުންނަށް އެއްވެސް އިސްތިސްނާއެއްނެތި މި އިނާޔަތް ދިނުމުގެ އަގު ވަރަށް ބޮޑުވާނެއެވެ. އެކަމަކު އެއްވެސް ވިޔަފާރީގެ މުއާމަލާތެއްގަވެސް ބަލަންޖެހޭ އަސާސީ ދެކަމެއް އޮންނާނެއެވެ. އެއީ އެކަމަކަށް ކުރާ ޙަރަދާ އެޙަރަދުގެ ސަބަބުން ލިބޭ މަންފާ އެވެ. މިގޮތުން ބަލާއިރު ޔޫބީއައި ގެ އިނާޔަތް ލިބުމުގެ ސަބަބުން ގައުމަށާ ރައްޔިތުންނަށް ކުރާ ފައިދާތައް ކުރާ ޙަރަދަށް ވުރެ އެތައް ގުނައެއް ބޮޑުވާނެއެވެ.
މިގޮތުން ސިއްހީގޮތުން ލިބޭ ފައިދާއާ، މީހުން ކުށްތަކަށް އަރައިގަތުން މަދުވުމުން ލިބޭ ފައިދާތަކާ، ތުއްތު ކުދިންގެ ސިކުނޑި ތަނަވަސްވެ (އައި ކިއު ލެވެލް މަތިވުން) ފަދަ ކަންތައްތަކަކީ އަހަރު ތަކެއް ފަހުން މުޅި ގައުމުގެ ތާރީޙް ބަދަލު ކޮށްލާވަރުގެ ކަންތައްތަކެވެ. ކުރުކޮށް ދަންނަވަންޏާ މިއީ އަޅުވެތިކަމުގެ ތެރެއިން މިނިވަންކަން ލިބުން ފަދަ ކަމަކެވެ. އިހުމާލު ކޮށް ސިޔާސީ ކުޅިވަރު ކުޅެން ދޫކޮށްލަން ހެޔޮވެސް ނުވާވަރުގެ ކަމެކެވެ.
އެކަމަކުވެސް މިފަދަ އިނާޔަތެއް ރާއްޖޭގެ ހުރިހާ ރައްޔިތުންނަށް ދޭން ވަރަށް ބޮޑު އަދަދެއްގެ ފައިސާ ބޭނުންވާނެތީ، އަލަށް ތައާރަފް ކުރާ އިންކަމް ޓެސް އިން މިޙަރަދު ކުރުމަކީ އެންމެ އެކަށީގެންވާ ގޮތެވެ. މުޅި ދުނިޔޭގަވެސް އިންކަމް ޓެކްސް ނުނަގާ ވަރަށް މަދު ގައުމުތަކުގެ ތެރޭގަ ރާއްޖެ ހިމެނޭއިރު، އިންކަމް ޓެކްސް ގެ ނިޒާމް މިފަދަ ރައްޔިތުންނަށް ފައިދާ ހުރި ނިޔަތެއްގަ ކުރުމަކީ އެންމެ އެކަށީގެންވާ ރަނގަޅު ގޮތުވެ.