ދައުލަތުން ރައްޔިތުންނަށް އިނާޔަތް ދޭން ފެށުމަށް އާންމު ކޮށް ކިޔާ އުޅޭ ނަމަކީ ވެލްފެއާ ސްޓޭޓް މިއެވެ. މިކަން ފެށިގެން އައީ އިޖްތިމާއީ ހަމަނުޖެހުންތަކުގެ ތެރެއިން ރައްޔިތުން ބާރުވެރިކަން ހޯދަން ކުރި މަސައްކަތް ތަކުގެ ތެރެއިންނެވެ. މިގޮތުން އެމެރިކާ، ފަރަންސޭސި ވިލާތް، ޔޫރަޕް ގެ ގިނަ ގައުމުތަކާ ކޮމިއުނިސްޓް ގައުމުތައް ކަމަށް ބެލެވުނު ޗައިނާ އަދި ރަށިޔާ ފަދަ ގައުމުތަކަށް ވެސް މި އިނާޔަތް ތައް ގެނެވުނެވެ. އެކަމަކު މިއީ ސިޔާސީ ގޮތުން ކަނާތު ފިޔަ، އަދި ވާއަތު ފިޔަ މިދެފަރާތުގެ ވިސްނުން ވަރަށް ބޮޑަށް ތަފާތުވެފަވާ ވިސްނުމެއްގެ ތެރެއިންނެވެ. މިއަދުގެ ދުނިޔޭގަ ޔުނިވާސަލް ބޭސިކް އިންކަމް ނުވަތަ އަސާސީ އުޖޫރަ ގިނަ އިގްތިސޯދީ އިލްމު ވެރިން ސިފަ ކުރައްވަނީ ވެލްފެއާ ސްޓޭޓް ގެ އެންމެ މަތީ ލެވެލް ކަމަށެވެ. އެކަމަކު ކުރިން ހެދިފައިވާ ވެލްފެއާ ސިސްޓަމްތައް އޯވަހޯލް ކޮށް ބަދަލު ކޮށްލުމަކީ ސިޔާސީ ގޮތުން ފަސޭހަ ކަމަކަށް ނުވާނެތީ އަދި ދުނިޔޭގެ އެއްވެސް ގައުމަކަށް މިކަން ކުރެވިފައެއް ނެތެވ. މި އިނާޔަތް ރައްޔިތުންނަށް އެންމެ ފުރަތަަމައަށް ގެނެސްދޭ ގައުމަކަށް ސްވިޒަލެންޑް ވާނެކަމަށް ގިނަ އިގްތިސޯދީ މާހިރުން ދެކެއެވެ. އެއީ ސްވިޒަލޭންޑަކީ ކުޑަ، މީހުންމަދު މުއްސަނދި ގައުމަކަށް ވީމައެވެ. ކުޑަނަމަވެސް އަހަރެމެން ގެ ދިވެހިރާއްޖެ ވެސް މިއޮތީ ބޭސިކް އިންކަމް ދެވޭފަދަ ހާލަތެއްގައެވެ. މިަކަމށް ބޭނުންވަނީ ސިޔާސީ އިސްނެގުމަކާ ރައްޔިތުންގެ ހޭލުން ތެރި ކަމެވެ.